Құлдықта өткен 12 жыл

«Құлдықта өткен 12 жыл» кітабында отыз үш жасында адам сатумен айналысатын қарақшылардың қолына түсіп, қырық бес жасында бостандыққа қолы əрең жеткен америкалық қаранəсілді Соломон Нортаптың басынан кешкен ауыр тағдыры баяндалады. Тіршілігі қарапайым, сəулелі үмітін, асыл махаббаты мен адал еңбегін дəтке қуат етіп жүрген азат адам ақша үшін ештеңеден тайынбайтын озбыр адамдардың кесірінен еркін өмірімен қоштасып, бір-ақ күнде құлға айналады. 12 жыл бойы құлдықтың ауыр қамыты мойнынан түспесе де, Соломон өмірге деген сүйіспеншілігін, асқақ рухын жоғалтпай, ақыры, бостандыққа қол жеткізеді. Кітапта тек өмірде болған нақты оқиғалар баяндалады. Оның естелігі оқыған адамды бейжай қалдырмайды, бостандық, азаттық, еркіндік деген асыл сөздердің құдіретін жете түсінгендей боласыз. Тағдырдың қыл арқанын тек күшті адамдар ғана үзетінін мойындайсыз.